Bilang bahagi ng patuloy na pagpapatupad ng Integrated Approach in Management of Major Biodiversity Corridors in the Philippines o mas kilala bilang BD Corridor Project sa ilalim ng Component 3.2 – Sustainable Land Management (SLM), nagsagawa ang Department of Agriculture – Bureau of Soils and Water Management (DA-BSWM) ng Capability Enhancement Training and Workshop para sa mga miyembro ng Dumlan Mansaka Ancestral Domain Farmers Association (DMADFA) sa Purok 6, Barangay Dumlan, Maco, Davao de Oro noong Hulyo 14, 2026. 

Pinangunahan ang nasabing aktibidad nina Engr. Kurt Ming at Engr. Johnry Cellan mula EMBC Team, kasama si Engr. Khyla Ibatan mula sa Central Office. Ito ay dinaluhan ng mga miyembro at opisyales ng Dumlan Mansaka Ancestral Domain Farmers Association (DMADFA) gaya nina GBBYN. Nina S. Radores, IPS Head ng Barangay Dumlan, at Ailene M. Olayer, ang Chairperson ng DMADFA. Nakiisa rin sina Paul Glenn S. Arciaga, Barangay Dumlan IPMR; Teresita B. Marcial, ADMO Head ng Maco; at Philip Cahulogan kinatawan ng Municipal Agriculture Office (MAO) ng Maco. 

Nagsimula ang programa sa pagbibigay ni Engr. Khyla Ibatan ng overview ng Component 3.2 – Sustainable Land Management (SLM) ng BD Corridor Project. Tinalakay niya ang layunin ng proyekto, ang mga katuwang na funding agencies, ang mga pangunahing target at inaasahang resulta nito, gayundin ang kasalukuyang status ng implementasyon ng proyekto sa Eastern Mindanao Biodiversity Corridor.  

Kasunod nito, tinalakay ni Engr. Johnry Cellan ang mga dahilan sa paguho ng lupa (soil erosion). Ibinahagi rin niya ang iba’t ibang Sustainable Land Management (SLM) Approaches and Technologies na maaaring gamitin upang mapanatili ang kalusugan ng lupa at mapataas ang produktibidad ng sakahan. Sinundan ito ng presentasyon ni Engr. Khyla Ibatan tungkol sa pagtatatag ng SLM Exemplar Site, na magsisilbing demonstration area para sa pagpapatupad ng biodiversity-friendly at sustainable farming practices. 

Nagkaroon din ng lecture si Engr. Johnry Cellan kung papaano gumawa ng A-Frame at papaano ang maayos na farm record keeping sa lupang sinasaka. Ipinakita rito ang kahalagahan ng wastong pagdidisenyo ng tanim sa mga matataring na lugar at ang sistematikong pagtatala ng mga gastusin, ani, at iba pang datos sa sakahan. Pagkatapos nito ay tinalakay ni Engr. Kurt Ming ang Farm Development Planning na nakatuon sa tamang pagpaplano sa sakahan na nakaayon sa prinsipyo ng Sustainable Land Management. 

Sa huling bahagi ng programa isinagawa ang presentasyon ng Supplementary Memorandum of Agreement (MOA) para sa mga opisyal at miyembro ng Dumlan Mansaka Ancestral Domain Farmers Association (DMADFA). Layunin ng konsultasyong ito na ipaliwanag ang nilalaman ng MOA at mabigyan ng pagkakataon ang mga kinatawan ng komunidad na magbigay ng kanilang mga mungkahi sa probisyon ng dokumento bago ang nakatakdang MOA Signing Ceremony. 

Sa pamamagitan ng isinagawang Capacity Building Training and Workshop, patuloy na pinalalakas ng DA-BSWM ang kakayahan ng mga katutubong pamayanan sa pagpapatupad ng Sustainable Land Management (SLM) at biodiversity-friendly agricultural practices. Inaasahang magiging mahalagang hakbang ito  tungo sa matagumpay na pagpapatupad ng Sustainable Land Management Exemplar Site sa Barangay Dumlan at sa pangmatagalang pangangalaga ng saribuhay at likas na yaman sa Eastern Mindanao Biodiversity Corridor. | via Engr. Kurt Ming 

#DA #BSWM #MasaganangAgrikultura #MaunladNaEkonomiya #BagongPilipinas #ParaSaMasaganangBagongPilipinas #SustainableLandManagement