Isinasagawa taun-taon tuwing buwan ng Hunyo ang tree planting activity bilang pagdiriwang sa Soil Conservation Month ng Department of Agriculture – Bureau of Soils and Water Management (DA-BSWM) sa pangunguna ng Soil Conservation and Management Division (SCMD). Sa taong ito, ang napiling lugar upang isagawa ang aktibidad ay ang Sitio Dueg, Barangay Maasin, San Clemente, Tarlac, na tahanan ng dalawang Indigenous Cultural Communities, ang mga Aeta Mag-Antsi at Abeleng.
Idinaos ang aktibidad noong Hunyo 25, 2026, kung saan nagsama-sama ang mga kawani ng Bureau of Soils and Water Management, mga opisyal ng Local Government Unit (LGU), mga opisyal ng barangay, at mga miyembro ng mga katutubong pamayanan.
Ang pagdiriwang ng Soil Conservation Month 2026 ay may temang “Lupa: Pagkain, Seguridad, Buhay,” na nagbibigay-diin sa mahalagang papel ng lupa sa pagtitiyak ng seguridad sa pagkain, pagpapanatili ng kalikasan, at pagpapanatili ng likas na yaman para sa kapakinabangan sa kasalukuyan at mga susunod na henerasyon.
Bilang bahagi ng pagdiriwang, humigit-kumulang 350 punla ng mga punong namumunga ang itinanim sa araw ng aktibidad, kabilang ang Saging na Saba, Kalamansi, Langka (Latexless), Kasoy, at Sweet Tamarind. Ang mga punla ay itinanim sa humigit-kumulang tatlong (3) ektaryang bahagi ng magkabilang gilid ng bundok.
Kabilang sa mga dumalo sa aktibidad si Hon. Roseller Toledo, Municipal Mayor ng San Clemente, Tarlac. Sa kanyang mensahe, nagpahayag siya ng taos-pusong pasasalamat sa BSWM sa pagpili sa kanilang munisipalidad bilang lugar ng pagdarausan ng tree planting activity. Binigyang-diin din niya ang kahalagahan ng pagtatanim ng mga punong namumunga sa kabundukan, sapagkat hindi lamang ito nakatutulong sa konserbasyon ng lupa, kundi nagsisilbi rin itong pangmatagalang pinagkukunan ng pagkain, karagdagang kabuhayan, at kita para sa mga katutubo at iba pang mamamayan ng komunidad.
Nagbahagi rin ng mensahe si Engr. Eduardo V. Alberto, BSWM OIC-Assistant Director kung saan ikinuwento niya kung paano napili ang Sitio Dueg bilang lugar ng aktibidad at ipinaliwanag ang kahalagahan ng lupa bilang pundasyon ng pagkain, seguridad, at buhay ng bawat pamayanan.
Bilang pangwakas na mensahe, nagbigay ng paalala si Engr. Evangeline F. Dacumos, Supervising Agriculturist ng Conservation Agriculture Technology Development Section (CATDS) – SCMD, na hikayatin ang mga miyembro ng komunidad at mga kawani ng LGU na patuloy na alagaan ang mga punong itinanim upang matiyak ang kanilang paglago at makatulong sa pagpapanumbalik ng sigla ng kalikasan at saribuhay sa lugar.
Ang tagumpay ng aktibidad ay bunga ng sama-samang pagkilos at pagtutulungan ng mga ahensya ng pamahalaan, lokal na pamahalaan, at komunidad. Nawa’y magpatuloy ang matibay na ugnayan at aktibong pakikipagtulungan ng lahat ng sektor upang maisulong ang konserbasyon ng lupa at likas na yaman para sa kapakinabangan sa kasalukuyan at mga susunod na henerasyon.
Ang DA-BSWM na pinamumunuan nina Officer-in-Charge Director Denise A. Solano, at Officer-in-Charge Assistant Director Eduardo V. Alberto, Rabe, ay ang pambansang ahensiyang itinalaga para sa responsableng pangangasiwa at pagpapaunlad ng mga likas-yamang lupa at tubig para sa agrikultura ng bansa.
(Mia Daniella Cayas, SCMD)
#DA #BSWM #MasaganangAgrikultura #MaunladNaEkonomiya #BagongPilipinas #ParaSaMasaganangBagongPilipinas #SLM #SamaNaTungoSaLupangMasagana #SLM #SamaNaTungoSaLupangMasagana
